ESA, EFTAs overvakingsorgan, har idag godkjent den norske transportstøtta. Det tyder at bedrifter i heile Nord-Noreg og ei rekkje utkantkommuner andre stadar i landet vil kunne nyte godt av denne stønaden.
24.04.2007 :: ESA har vurdert om den direkte transportstøtta er i samsvar med EØS-avtalen. Konklusjonen idag gjer det mogleg for Noreg å halde fram med denne ordninga, som er ein direkte stønad til bedrifter i utkantstrøk.
Stønadsordninga gjeld i heile Nord-Noreg, mesteparten av Nord-Trøndelag, fleire kommuner i Sør-Trøndelag, Møre og Romsdal og Sogn og Fjordane, samt nokre kommuner i Hordaland og Buskerud.
Ordninga er meint å skulle kompensere for ulempene med ekstra transportkostnader for godstransport innanlands, og gjeld altså for bedrifter i distrikt med lange avstandar og tynn busetting.
ESA godtek at transportstønaden blir vidareført til 2013. Årleg utgjer dette omlag 70 millionar kroner, som blir administrert av fylkeskommunene.