- EUs vilje til politisk og økonomisk handling i Midtausten er naudsynt. Det understreka utanriksminister Jonas Gahr Støre, då han i går drøfta situasjonen i Midtausten med spesialutsending Tony Blair og presidenten for Europaparlamentet, Hans-Gert Pöttering.
26.03.2008 :: 
Europaparlamentets president Hans-Gert Pöttering ønskjer Jonas Gahr Støre velkomen. (Foto: Europaparlamentet)
Det var Pöttering som hadde invitert Støre og Blair til møtet i Europaparlamentets arbeidsgruppe for Midtausten, for å sette fokus på situasjonen for palestinarane. Tony Blair er den såkalla Kvartetten (FN, EU, USA og Russland) sin spesialutsending til Midtausten.
I innlegget sitt understreka Støre at EUs vilje til å gjere noko i Midtausten, både politisk og økonomisk, er naudsynt: - Midtausten grensar til Europa, og det er i vår direkte interesse at fredsprosessen lukkast. Det er ei ære for meg å arbeide tett med kommissær Benita Ferrero-Waldner, og eg applauderer Europaparlamentet si støtte til EUs aktive engasjement, sa den norske utanriksministeren.
Blair sa at konflikten er mogleg å løyse, men at det er eit kappløp med tida. Han meinte også at det er større villje til å engasjere seg i EU, og Støre oppfordra EU til å engasjere seg meir i Kvartetten. Dette støtta også statssekretær for Europa-saker, Jean-Pierre Jouyet, som erstatta den franske utanriksministeren i panelet.
- Vi må halde partane ansvarlege. I Annapolis sa president Bush at USA vil vere dommar over kva framgang ein oppnår. La oss då vere juryen, oppmoda Støre.
- Det er utåleleg for Israel å leve med rakett-angrepa frå Gaza, og landet har rett til å forsvare seg. Men vi må oppfordre Israel til å gjere det utan overdriven bruk av vald, som fører til ein ny spiral med aukande vald. Og medan forhandlingane pågår, treng palestinarane å sjå at fredsprosessen fører til meir fred.
Les heile innlegget her.
Støre og Blair var i Brussel for å møte den franske utanriksministeren og EUs utanrikskommissær til ein arbeidsmiddag seinare på kvelden. Men både Bernard Kouchner og Benita Ferrero-Waldner vart forhindra frå å delta. Dei fire skulle ha drøfta oppfølgjinga av gjevarlandskonferansen for den palestinske staten. Den såkalla Paris-konferansen i desember i fjor resulterte i lovnadar om fleire milliardar kroner i bidrag til palestinarane. Men det er eit problem at mange land ikkje har følgt opp lovnadane med konkret handling.
Før påske annonserte Regjeringa at Noreg bidrar med 228 millionar kroner til etablering av Verdsbankfond for budsjettstøtte til palestinske styresmakter. Dette er i tråd med kva Noreg tidlegare har lova om slik budsjettstøtte. Dei norske pengane vil bli utbetalt i april.
Noreg har leia gjevarlanda sitt arbeid gjennom formannskapet i AHLC (Ad-Hoc Liason Committee) sidan 1994. Neste møte i AHLC er 2. mai i London. Der skal ein fortsette arbeidet med å gjere løfta om til innbetalingar som kjem palestinarane til gode. Møtet vil ikkje berre fokusere på internasjonal støtte til den palestinske staten og reformer. - I London er det på tide å halde Israel ansvarleg for å betre tilgangen til Gaza-stripa. Det er også på tide å be om meir direkte engasjement frå dei arabiske statane, sa Støre.
I går annonserte også Kommisjonen at dei gjev 300 millionar euro til palestinarane. 71 millionar euro er øyremerka FNs hjelpeorganisasjon for palestinske flyktningar (UNRWA), og 229 millionar euro blir kanalisert gjennom PEGASE, EUs finansieringsmekanisme for utvikling og bygging av infrastruktur og sosial utvikling i De palestinske områdene.
Rune Bjåstad