Før den offisielle opninga av Norway House på ettermiddagen har både Kronprinsen og utanriksministeren fleire programpostar i Brussel. Kronprisen byrjar dagen med eit besøk i Europaparlamentet der han møter president for parlamentet, tyske Hans-Gert Pöttering. Turen går vidare til Norway House, der Kronprinsen vil få ei omvisning i bygget.
Norway House ligg rett over gata frå Berlaymontbygninga til Europakommisjonen. Foto: Rune Bjåstad.
Møter Kommisjonspresidenten
Kronprins Haakon er invitert til lunsj hjå José Manuel Barroso i Europakommisjonens hovedkvarter Berlaymont, like ved Norway House. Etter møtet med Barroso går turen til rådsbygninga, kor Kronprinsen får ei omvisning av vise-generalsekretær i Rådet, Pierre de Boissieu. Seinare på ettermiddagen er det lagt inn eit møte med Sveriges ambassadør til EU, Christian Danielsson, der Kronprinsen vil bli orientert om førebuingane til Sveriges formannskap i Rådet, som tek til 1. juli i år.
Arktis, energi og kommissærar
Utanriksministeren sin dag i Brussel tek til med eit frokostmøte i regi av European Policy Centre (EPC), med Arktis som tema. Deretter går turen til Berlaymontbygget, der Støre skal i møte med kommissær med ansvar for utvidelse, finske Olli Rehn og kommissær med ansvar for handel, britiske Catherine Ashton. Utanriksministeren er saman med Kronprinsen invitert til lunsjen hjå Barroso, før han seinare på dagen opnar rundebordskonferansen om fornybar energi og offshore vindkraft i Norway House.
Opnar Norway House
Klokka 18 står Kronprinsen og utanriksministeren for den offisielle gjenopninga av Norway House. Til opninga kjem også viktige kontakter og beslutningstakarar i EU-systemet. Norway House husar forutan EU-delegasjonen sju norske aktørar, og arrangementet markerer såleis også kor viktig det er at norske aktørar er på plass i Brussel.